Karuwagan

Karuwagan

Paano ba dapat sukatin ang katapangan?

Sa tibay na humarap sa giyera,

Sa walang takot na hamunin ang kaaway,

O sa pagpaparaya kahit na nasasaktan?

Paano nga kaya nasusukat ang katapangan?

Sa pamamagitan ng dumadaloy na dugo,

Sa hindi paaawat at pasusupil na prinsipyo,

O sa pagtanggap sa sariling kahinaan?

Nakadaragdag ba sa iyong katapangan,

Ang kahinaan ng iba?

Nakababawas ba sa iyong katapangan,

Ang kalakasan ng isa?

Di lahat ng may baril, o may hawak na sundang,

Ay maituturing na matapang.

Sadyang may mga katapangang paimbabaw lamang,

Para maikubli ang sariling karuwagan.

***

Ang tulang ito ay kabilang sa aking antolohiya na "Isampal mo sa Makata". Pansamantala, maaaring mabasa ang iba pang mga tula dito.